法律面前，窮人含X

[轉載‧節錄] 法律面前

呢幾日，成日響網上睇到人話：「法律面前，窮人含X」呢句。

我諗我唔算得上係窮人，未至於要「含X」咁陰功，不過法律面前，只要你個對手夠疊水，我覺得查實都幾難有機會。

當你發覺每一次你對家輸左都走黎上訴，請既大狀一個貴個一個，一個出名過一個既時候，做佢地既對手，真係幾心寒架。即使你幾咁相信，道理其實響自己果邊。

地方法院俾你贏左，又點？上面仲有咁多層，你有冇足夠彈藥同人玩到上高院上終審先？

司法程序既唔公平，在於呢個制度當中既「風險成本」，分別對於有錢人同冇咁有錢既人黎講，有太過大既差距。

好多時候一個法律遊戲結束既原因，並唔係因為仲裁公平合理地作出左裁決，而係參與既其中一方，再冇能力承受去繼續訴訟既「風險成本」，而被逼放棄。

我最記得當日律師朋友同我講果句：「CK，算啦。呢個遊戲再玩落去，你玩唔起呀。」

可能以下既幾句說話，係一個好大既歪理，不過當日我聽完呢句說話之後，果一刻的確好渴望成為一個有錢人。原因並唔係因為我好期望過有錢佬奢華既生活，而係覺得，只有成為有錢人，司法制度先能夠真正咁保障你，道理先真正有機會企響你身邊。

得得得，我知我知。呢個諗法，政治不正確丫嘛。

http://manincentral.blogspot.com/