Advice

　　《赤壁》絶對絶對係一齣垃圾。

　　剪裁唔掂。本來用「新野之戰」開場唔係唔得，但要講埋長板橋、百萬軍中藏阿斗等，未免志大才疏。每逢見到諸葛亮同周瑜，例有勁多特寫、僈鏡；單講兩人相遇的一場，已用咗十幾分鐘，節奏慢極。孫權唔知點解變咗主角，有一大段講佢點下決心抗曹。

　　高潮原來係一場曹軍先頭部隊嘅敗杖，二千輕騎先鋒「輕易」中伏，被劉孫聯軍圍堵後，再由張飛、關羽、趙雲等以無雙方式「埋齋」。啫係點？士兵們排好陣郁都唔郁，再等大將們以一敵百。e 段垃圾又長十數分鐘，我瞓著咗。

　　特技好假，十年前嘅《風雲》會專業啲。

　　我預咗林志玲係花瓶，但佢幾段戲真係唔知想點；而且原來戲中小喬係曹操南下嘅真正目標，志玲演此要角，是否選角失當？唯有看下回分解。

　　我真係睇唔到諸葛亮有書卷氣，周瑜如何雄姿英發，連關二哥、張飛等都係唔掂。連人物性格鮮明的三國時代，都可以搞到如斯田地，我都好佩服。

　　片長近兩個半鐘，原來連反間計殺蔡瑁張允都未講到，怪不得片名如此，因為下一集先係《赤壁之戰》。

　　如此爛片，大家真係唔好入場，否則啲電影商以為係「大片」就夠，以致「劣幣驅逐良幣」。