Nationalization

　　我幾buy 曹仁超，不過佢以下一段文章有問題。

有朋友問：社會主義同資本主義有乜分別？其實兩者分別唔大。社會主義國家將賺錢嘅企業國有化，資本主義國家則將蝕本嘅企業國有化。例如英國政府今年國有化 Northern Rock銀行、美國政府今年國有化七間銀行、阿根廷政府國有化蝕大本嘅Aerolineas Argentinas航空公司等等；唔使幾耐，相信美國政府將國有化房利美及房貸美。

http://chaozmarket.blogspot.com/

　　雖然作者目的係搞gag ─"其實兩者分別唔大"，不過因為佢偷換咗一些概念，容易令人誤會，不妨由我幫手澄清一下。

　　首先，社會主義(共產主義)國家不只「國有化」賺錢嘅企業，唔賺錢嘅命運都係一樣，因由國家掌有「生產資料」（factors of production），「企業」根本唔應該存在。

　　第二，將(蝕本嘅)企業「國有化」根本係「反資本主義」行為。資本主義同自由市場係「顛鼠」，自由市場容許/鼓勵競爭，競爭/生產力強者勝。資本主義追求資本(capital)，因資本係「生產資料」中決定生產力的最主要因素，這也是為什麼所有「資本主義」國家皆強調合法的「私有產權」。除非「將企業國有化」都叫做自由市場，或者「非自由市場」又可與資本主義同存，否則上文的說法唔成立。

　　點解會咁？其實英、美、阿等國，或大部份已發展國家，應該屬於「混合經濟」或者近於「福利國家」。英、美等國也不是犯法「無償」強奪產權，只不過係為負家產的企業「包底」；用納稅人荷包找數，仲唔係「福利國家」？要數資本主義/自由市場，還看今日香港。